有关市民摄取碘质的联合建议

政府电视宣传短片

Facebook 帖文

2023年11月16日

【请注意：怀孕同哺乳期妈妈️每日需摄取足够碘🤰🏻】
碘质水平调查(2019)发现，大部分怀孕同哺乳期妇女都有 #碘摄取量不足 嘅问题。😥
「碘」系支持胎儿和婴儿生长同脑部发育嘅重要微量营养素💡。如果怀孕中期嘅胎儿至 BB出生后3岁呢个关键时期 #碘质不足，BB大脑同中枢神经系统就可能受到不可逆转嘅损害。由于怀孕及哺乳期间妈妈要供应碘质畀BB，身体对碘质嘅需求增加，处于呢两段时期嘅妇女特别容易患上 #碘缺乏疾病。因此，怀孕及哺乳期间嘅妈妈应加倍注意自己每日嘅碘质摄取量，以满足身体所需。💪🏻
世界卫生组织认为，由缺乏碘所引起嘅脑损伤系最可能预防嘅一种疾病，并建议青少年同成人每日摄取150微克碘，而怀孕及哺乳嘅妇女则每日摄取250微克嘅碘。🤱🏻
预防碘缺乏病工作小组建议市民增加碘摄取量以维持足够嘅碘营养，并有以下额外建议畀怀孕及哺乳妇女：
💊每日服用含最少150微克碘嘅补充剂
💡如有疑问，应咨询医学建议
💡患病或有甲状腺问题嘅朋友应咨询医护人员，并按指引服用补充剂

2023年11月14日

【了解加碘盐🔍】
碘系维持正常甲状腺功能、生长同发育必需嘅微量营养素。世界卫生组织建议青少年及成年人每日摄入150微克碘。除咗食用碘质丰富嘅食物之外，更可使用加碘食盐代替一般食盐。
必看👀 : 使用加碘嘅食盐需注意💡️
✅用量🍽：以加碘食盐代替一般食盐，并确保每日总摄入量少于5克(1茶匙)以降低患上高血压嘅风险
✅储存🧰：由于加碘食盐内嘅碘质可能会受湿气、高温及阳光影响，加碘食盐应储存喺密封嘅有色容器内及放置喺阴凉干燥嘅地方
✅用法🍳：为减低碘质喺烹调过程中流失，尤其经长时间烹煮同压力锅烹煮导致流失，应尽量喺上菜时先至将加碘食盐加入菜肴
✅建议💡：有甲状腺问题嘅朋友应就使用加碘食盐咨询医学建议🥼

2023年11月9日

【「#碘」从哪里来? 】
「碘」系身体制造甲状腺激素支持生长发育嘅重要微量营养素。根据 #世卫建议 ，成人同青少年每日应摄取150微克碘；而怀孕及哺乳期妇女则每日应摄取250微克嘅碘，以满足身体日常所需。
「碘」对人体咁重要，可以喺边度揾到？
✅ 碘质丰富嘅食物：海鱼🐟(如红衫鱼、比目鱼等)、海产(如海虾🦐、蚝、青口、蚬等)、鸡蛋🍳、牛奶🥛、奶制品🍦(包括芝士及乳酪等)、藻类 (包括海带、紫菜😋，但要避免高盐或高脂肪嘅即食零食🙅🏻)。
✅ 加碘食盐🧂：以 #加碘食盐 代替一般食盐，为免碘喺烹调过程中流失，适宜喺上菜时先加入，并注意每日进食少于5克（1茶匙）嘅份量以降低患上高血压嘅风险。💡要注意嘅系，有甲状腺问题嘅朋友应先问问医生意见。
2020至22年度人口健康调查发现，大多数人 (72.1%) 唔知道屋企有冇使用加碘食盐，只有分别 8.7% 嘅人表示每星期会食一次藻类(紫菜)，6.7% 嘅人表示每星期会食一次即食藻类 (紫菜) (包括预先包装嘅零食╱紫菜卷)。

2023年11月8日

【小心缺「碘」🔍】
#碘系人体必需嘅 #微量营养素，对我哋每个年龄阶段都非常重要！😤
我哋嘅甲状腺会用「碘」嚟制造甲状腺激素以支持生长同发育，当 #碘摄取量不足，甲状腺就会加倍运作以将甲状腺激素维持于正常水平，因而变得肿大，出现所谓「大颈泡」嘅现象💁🏻。而甲状腺素持续不足，仲会影响其他人体系统，包括神经系统、心血管功能、消化功能、新陈代谢、生长发育等。如果怀孕同哺乳妇女缺乏碘质嘅话，更可能会令BB脑部发育受损，严重嘅仲可能导致智力受损!
2020至22年度人口健康调查显示，15-34岁人士嘅尿碘浓度中位数为107.5微克/升，属碘摄取量足够；但35-54岁及55-84岁人士嘅尿碘浓度中位数分别为92.7及79.8微克/升，呢两组年龄层人士属于碘摄取量不足同轻度缺碘😯，因为根据世界卫生组织建议嘅流行病学标准，碘摄取量足够嘅人士，尿碘浓度中位数应该介乎100至199微克/升。
要增加碘摄入量，大家可以：
1. 选择食用碘含量丰富嘅食物，同使用蒸或少油快炒嘅方法，减少碘嘅流失；
2. 用 #加碘食盐 代替一般食盐，并确保每日总摄入量少于5克以降低患上高血压嘅风险(有甲状腺问题嘅人士应该先咨询医学建议)；
3. 怀孕同哺乳妈妈应每日服用含最少150微克碘嘅补充剂(患病或有甲状腺问题嘅人士应咨询医护人员，并按指引服用补充剂)。