有關市民攝取碘質的聯合建議

政府電視宣傳短片

Facebook 帖文

2023年11月16日

【請注意：懷孕同哺乳期媽媽️每日需攝取足夠碘🤰🏻】
碘質水平調查(2019)發現，大部分懷孕同哺乳期婦女都有 #碘攝取量不足 嘅問題。😥
「碘」係支持胎兒和嬰兒生長同腦部發育嘅重要微量營養素💡。如果懷孕中期嘅胎兒至 BB出生後3歲呢個關鍵時期 #碘質不足，BB大腦同中樞神經系統就可能受到不可逆轉嘅損害。由於懷孕及哺乳期間媽媽要供應碘質畀BB，身體對碘質嘅需求增加，處於呢兩段時期嘅婦女特別容易患上 #碘缺乏疾病。因此，懷孕及哺乳期間嘅媽媽應加倍注意自己每日嘅碘質攝取量，以滿足身體所需。💪🏻
世界衞生組織認為，由缺乏碘所引起嘅腦損傷係最可能預防嘅一種疾病，並建議青少年同成人每日攝取150微克碘，而懷孕及哺乳嘅婦女則每日攝取250微克嘅碘。🤱🏻
預防碘缺乏病工作小組建議市民增加碘攝取量以維持足夠嘅碘營養，並有以下額外建議畀懷孕及哺乳婦女：
💊每日服用含最少150微克碘嘅補充劑
💡如有疑問，應諮詢醫學建議
💡患病或有甲狀腺問題嘅朋友應諮詢醫護人員，並按指引服用補充劑

2023年11月14日

【了解加碘鹽🔍】
碘係維持正常甲狀腺功能、生長同發育必需嘅微量營養素。世界衞生組織建議青少年及成年人每日攝入150微克碘。除咗食用碘質豐富嘅食物之外，更可使用加碘食鹽代替一般食鹽。
必看👀 : 使用加碘嘅食鹽需注意💡️
✅用量🍽：以加碘食鹽代替一般食鹽，並確保每日總攝入量少於5克(1茶匙)以降低患上高血壓嘅風險
✅儲存🧰：由於加碘食鹽內嘅碘質可能會受濕氣、高溫及陽光影響，加碘食鹽應儲存喺密封嘅有色容器內及放置喺陰涼乾燥嘅地方
✅用法🍳：為減低碘質喺烹調過程中流失，尤其經長時間烹煮同壓力鍋烹煮導致流失，應盡量喺上菜時先至將加碘食鹽加入菜肴
✅建議💡：有甲狀腺問題嘅朋友應就使用加碘食鹽諮詢醫學建議🥼

2023年11月9日

【「#碘」從哪裡來? 】
「碘」係身體製造甲狀腺激素支持生長發育嘅重要微量營養素。根據 #世衞建議 ，成人同青少年每日應攝取150微克碘；而懷孕及哺乳期婦女則每日應攝取250微克嘅碘，以滿足身體日常所需。
「碘」對人體咁重要，可以喺邊度搵到？
✅ 碘質豐富嘅食物：海魚🐟(如紅衫魚、比目魚等)、海產(如海蝦🦐、蠔、青口、蜆等)、雞蛋🍳、牛奶🥛、奶製品🍦(包括芝士及乳酪等)、藻類 (包括海帶、紫菜😋，但要避免高鹽或高脂肪嘅即食零食🙅🏻)。
✅ 加碘食鹽🧂：以 #加碘食鹽 代替一般食鹽，為免碘喺烹調過程中流失，適宜喺上菜時先加入，並注意每日進食少於5克（1茶匙）嘅份量以降低患上高血壓嘅風險。💡要注意嘅係，有甲狀腺問題嘅朋友應先問問醫生意見。
2020至22年度人口健康調查發現，大多數人 (72.1%) 唔知道屋企有冇使用加碘食鹽，只有分別 8.7% 嘅人表示每星期會食一次藻類(紫菜)，6.7% 嘅人表示每星期會食一次即食藻類 (紫菜) (包括預先包裝嘅零食╱紫菜卷)。

2023年11月8日

【小心缺「碘」🔍】
#碘係人體必需嘅 #微量營養素，對我哋每個年齡階段都非常重要！😤
我哋嘅甲狀腺會用「碘」嚟製造甲狀腺激素以支持生長同發育，當 #碘攝取量不足，甲狀腺就會加倍運作以將甲狀腺激素維持於正常水平，因而變得腫大，出現所謂「大頸泡」嘅現象💁🏻。而甲狀腺素持續不足，仲會影響其他人體系統，包括神經系統、心血管功能、消化功能、新陳代謝、生長發育等。如果懷孕同哺乳婦女缺乏碘質嘅話，更可能會令BB腦部發育受損，嚴重嘅仲可能導致智力受損!
2020至22年度人口健康調查顯示，15-34歲人士嘅尿碘濃度中位數為107.5微克/升，屬碘攝取量足夠；但35-54歲及55-84歲人士嘅尿碘濃度中位數分別為92.7及79.8微克/升，呢兩組年齡層人士屬於碘攝取量不足同輕度缺碘😯，因為根據世界衞生組織建議嘅流行病學標準，碘攝取量足夠嘅人士，尿碘濃度中位數應該介乎100至199微克/升。
要增加碘攝入量，大家可以：
1. 選擇食用碘含量豐富嘅食物，同使用蒸或少油快炒嘅方法，減少碘嘅流失；
2. 用 #加碘食鹽 代替一般食鹽，並確保每日總攝入量少於5克以降低患上高血壓嘅風險(有甲狀腺問題嘅人士應該先諮詢醫學建議)；
3. 懷孕同哺乳媽媽應每日服用含最少150微克碘嘅補充劑(患病或有甲狀腺問題嘅人士應諮詢醫護人員，並按指引服用補充劑)。